Щылэ мазэм и 25-м Адыгэ хэкум къыщыдэкIырэ Адыгэ гъазетхэм ятхьэматэхэр Мыекъуапэ щызэIукIагъэх,- джащ фэдэу къетхы гъазетэу Адыгэ Макъэ щылажьэу ПIатIыкъо Анет.
Бзэр ухъумэгъэным, зэкъош республикэхэу Къэбэртэе-Бэлъкъарым, Къэрэщэе-Щэрджэсым ыкIи Адыгеим азыфагу илъ зэпхыныгъэр гъэпытэгъэным, зэлъэпкъэгъу журналистхэр зэрэшIэнхэм, яхэгъэгу щыкъэбархэмкIэ зэдэгощэнхэм фэшI илъэс 26-рэ хъугъэу мы республикищым зэхэт номерхэу къыдагъэкIыхэрэм яаужырэ тедзэгъоу икIыгъэ илъэсым иикIыгъом къыдэкIыгъэм епхыгъэу зичэзыу зэIукIэгъур Мыекъуапэ щыкIуагъ. Мыщ хэлэжьэнхэу тыгъуасэ республикэ гъэзетэу «Адыгэ макъэм» къэкIогъагъэх Къэбэртэе-Бэлъкъар Республикэм къыщыдэкIырэ республикэ гъэзетэу «Адыгэ псалъ» зыфиIорэм иредактор шъхьаIэу ХьэшIуцIэ Мухьэмэдрэ Къэрэщэе-Щэрджэсым игъэзетэу «Черкес хэку» зыфиIорэм иредактор шъхьаIэу Тхьагъэпсэу Уцужьыкъорэ яIофшIэгъухэр ягъусэхэу.
ИкIыгъэ илъэсым къыдагъэкIыгъэ номерхэм язэфэхьысыжь ыкIи къихьэгъэ илъэсым ашIэнэу щытхэм къэзэрэугъоигъэхэр тегущыIагъэх. Iофтхьабзэр зэрищагъ «Адыгэ макъэм» иредактор шъхьаIэу Дэрбэ Тимур. Ащ ипэублэ псалъэ къыщыхигъэщыгъ ныдэлъфыбзэм изэгъэшIэнкIэ, икъэухъумэнкIэ, адыгэхэр нахь зэпэблагъэ хъунхэмкIэ зэхэт номерхэу къызэдыдагъэкIхэрэм мэхьанэшхо зэряIэр. Ащ пыдзагъэу мы илъэсэу къихьагъэр литературэм и Илъэсэу Урысыем зэрэщагъэнэфагъэм елъытыгъэу Iофтхьабзэу зэхащэнхэу рахъухьэхэрэм ар къатегущыIагъ. АщкIэ къыгъэнэфагъэмэ ащыщ зэнэкъокъу зэфэшъхьафхэр зэхэщэгъэнхэ зэрэфаер. Непэрэ щыIакIэм елъытыгъэу, электроннэ шIыкIэм цIыфхэр нахь зэрэтехьэхэрэм къыхэкIэу зэхэт номерхэр къызэрэдагъэкIырэм имызакъоу зэхэт сайт агъэпсымэ, ащ шIуагъэ къызэритыщтыр редактор шъхьаIэм къыIуагъ.
- Адыгэ лъэпкъыр зэбгырыдзыгъэми, тызэрыгущыIэрэ бзэр тIэкIу зэтекIыми, зэкIэми тыадыг ыкIи ащ тырэгушхо, - къыхигъэщыгъ ХьэшIуцIэ Мухьэмэд. - Мы зэхэт номерхэм зэкъош республикищым арыс адыгэхэр зэрепхых, нахь зэпэблагъэ зэфешIых, зыкIыныгъэ къахелъхьэ. Илъэсым къыкIоцI темэ зэфэшъхьафхэр зэхэт номерхэм къащытIэтыгъэх.
Гупшысэ гъэнэфагъэ яIэу, купкI ин ахэлъэу зэхэт номерхэр гъэпсыгъэхэ зэрэхъугъэм уимыгъэгушхон плъэкIырэп. Къихьэгъэ илъэсыми ащ тыкъыщыуцущтэп, ыпэкIэ тылъыкIотэщт.
Къэбэртэе-Бэлъкъарым, Къэрэщэе-Щэрджэсым ыкIи Адыгеим зэкъошныгъэу, зэныбджэгъуныгъэу азфагу илъым зэрэхагъэхъощтым зэхэт номерхэр зэрэфэIорышIэхэрэр къыIуагъ «Черкес хэкум» иредактор шъхьаIэу Тхьагъэпсэу Уцужьыкъо. Ежь ишIошIыкIэ, ахэр нахь гъэшIэгъоны зэрэхъущтхэ лъэныкъохэр къыхигъэщыгъэх.
Нэужым мэхьэнэ ин зиIэ IофшIэным дэлажьэхэрэм гуфэбэныгъэу фыряIэр, адыгэ лъэпкъым зэрэфэгумэкIыхэрэм ищысэу мы зэхэт номерхэр зэрэщытыр Урысые Федерацием культурэмкIэ изаслуженнэ IофышIэу, Адыгэ Республикэм инароднэ тхакIоу, илъэси 8-рэ «Адыгэ макъэм» Iоф щызышIагъэу Цуекъо Юныс къыIуагъ. Джащ фэдэу «Адыгэ макъэм» иредактор шъхьаIэ игуадзэу МэщлIэкъо Саидэ зэхэт номерхэр нахь гъэшIэгъон зэрэпшIын плъэкIыщт еплъыкIэхэр къыIуагъэх, къэзэрэугъоигъэхэми ащ дырагъэштагъ.