Адыгэ Республикэм иминистрэхэм я Кабинет изэIукIэу щыIагъэм анахьэу анаIэ зыщытырагъэтыгъэр бюджет мылъкум нахь шIуагъэ къытэу гъэфедэгъэным, кризисым пэшIуекIорэ Iофтхьабзэхэр, социальнэ пшъэрылъхэр гъэцэкIэгъэнхэм, джащ фэдэу радикальнэ нэшанэ зиIэ еплъыкIэ зэфэшъхьафхэм апэуцужьыгъэным пае лъэпкъ шэн-зэхэтыкIэхэр къэухъумэгъэнхэмкIэ Iофыгъо зэфэшъхьафхэр зэшIохыгъэнхэр ары.
Адыгэ Республикэм и Премьер-министрэ анахьэу анаIэ зытыраригъэдзагъэхэм ащыщ фэтэрыбэу зэхэт унэхэм ягъэцэкIэжьынкIэ мылъкум иугъоин епхыгъэ хэбзэгъэуцугъэу щыIэр гъэцэкIагъэ хъуным пае цIыфхэм ищыкIэгъэ лъэныкъохэр афызэхэфыгъэнхэр. КIэлэцIыкIу ибэхэм зычIэсыщт унэхэр ягъэгъотыгъэнхэм иIофыгъо зэшIохыгъэным пае унэхэм яшIынкIэ проектхэр къагъэхьазырынхэу пшъэрылъ ащ афишIыгъ.
Джырэ чIыпIэ къиным зэрищыкIагъэм тетэу къыхэкIыжьынхэм пае анахь мэхьанэ зиIэхэм ащыщ гъэпсэфыгъо мафэм ермэлыкъхэр зэрэзэхащэрэм къыкIырамыгъэчыныр. Адыгэ Республикэм экономикэ хэхъоныгъэмкIэ ыкIи сатыумкIэ иминистрэу ЛIыхэсэ Махьмудэ къызэриIуагъэмкIэ, тхьамафэу блэкIыгъэм ермэлыкъ 13 зэхащэгъагъ, чIыпIэхэм мэкъумэщ товархэр къащызышIыхэрэм япродукцие 200-м ехъу ахэм къарахьылIэгъагъ. БлэкIыгъэ гъэпсэфыгъо мафэхэм къалэу Мыекъуапэ, псэупIэхэу Тульскэм, Яблоновскэм, Инэм ыкIи станицэу Дондуковскэм ермэлыкъхэр ащыкIуагъэх.
Ащ дакIоу КъумпIыл Мурат пшъэрылъ афишIыгъ къыкIэлъыкIощт ермэлыкъхэм лъэшэу анаIэ тетэу зафагъэхьазырынэу, товарэу къырахьылIэрэм нахь зырагъэушъомбгъунэу, лымрэ щэмрэ ахэшIыкIыгъэхэм анахьэу анаIэ атырагъэтынэу, ащкIэ Адыгеимрэ хэгъэгум инэмыкI шъолъырхэмрэ ятоварышIхэр къызфагъэфедэнхэу.
Премьер-министрэм Адыгэ Республикэм икомитетэу контракт системэм щэфынхэм алъэныкъокIэ зегъэушъомбгъугъэным фэгъэзагъэм джыри зы пшъэрылъ фишIыгъ. Ар зыфэгъэхьыгъэр ахъщэр нахь шIогъэ ин къытэу гъэфедэгъэным пае къэралыгъо фэныкъоныгъэхэм апэIухьащтхэр къащэфхэ зыхъукIэ уплъэкIун Iофыр нахь тэрэзэу зэхащэныр ары.
Iэзэгъу уцхэр цIыфхэм зэраIэкIагъахьэхэрэм, бюджет хъарджхэр нахь макIэ шIыгъэнхэм пае Iофтхьабзэхэр зэрэрахъухьэхэрэм, хэбзэIахьхэмкIэ фэгъэкIотэныгъэхэм, бизнесым IэпыIэгъу тедзэ етыгъэным, хабзэм имуниципальнэ къулыкъухэм яIофшIэн шIуагъэу къытырэм зыкъегъэIэтыгъэным япхыгъэ Iофыгъохэм мы зэIукIэм щанэсыгъэх.
- Тиреспубликэ ихэхъоныгъэкIэ зишIуагъэ къэкIощт Iофтхьабзэхэр ары тиIофшIэнкIэ анахьэу тынаIэ зытедгъэтын фаехэр, мылъкоу ахэм апэIухьэрэми тэрэзэу тегупшысэн, лъэпсэ икъу щыIэным тынаIэ тедгъэтын, тизекIуакIэкIи зэдегъэштэныгъэ, чаныгъэ тхэлъын фае. Отраслэ пэпчъ хэхъоныгъэ зэришIыщт шIыкIэр министерствэхэр ары изыхъухьан фаер, - къыкIигъэтхъыгъ КъумпIыл Мурат.
Адыгэ Макъ