Адыгэ быракъым и Мафэ мэлылъфэгъу мазэм и 25-м хэбзэ шапхъэмэ адиштэу апэрэу тиреспубликэ щагъэмэфэкIыщт. Ащ зызэрэфагъэхьазырырэм ехьылIэгъэ зэхахьэ Мыекъуапэ щыкIуагъ.
Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр зэхэщэкIо купым изэхэсыгъо зэрищагъ. Ащ зэрэхигъэунэфыкIыгъэу, Правительствэм икъулыкъушIэхэр, еджапIэхэр, общественнэ движениехэр мэфэкIым чанэу хэлэжьэщтых.
Зэхахьэм къыщыгущыIагъэх Адыгэ Республикэм гъэсэныгъэмрэ шIэныгъэмрэкIэ иминистрэ игуадзэу Къэрэтэбэнэ Махьмудэ, Адыгеим культурэмкIэ и Министерствэ иотдел ипащэу Шэуджэн Бэлэ, Мыекъуапэ иадминистрацие культурэмкIэ игъэIорышIапIэ ипащэу Цэй Розэ, Адыгэ Республикэм и Къэралыгъо академическэ къэшъокIо ансамблэу «Налмэсым» идиректорэу Бастэ Азмэт, художественнэ пащэу Хъоджэе Аслъан, тиреспубликэ иобщественнэ движениеу «Адыгэ Хасэм» культурэмкIэ икомитет ипащэу Шъхьаплъэкъо ГъучIыпсэ, ащ игуадзэу Болэкъо Аслъан.
МэфэкIым общественнэ-политикэ мэхьэнэ ин зэриIэр къэгущыIагъэхэм къыхагъэщыгъ. Хэбзэ шапхъэхэм адиштэу Адыгеим быракъым и Мафэ игъэкIотыгъэу агъэмэфэкIыщт. Тилъэпкъэгъухэу Урысыем ишъолъырхэм арысхэм, IэкIыб хэгъэгухэм ащыпсэурэмэ адыгэ быракъым имэфэкI хагъэунэфыкIыщт.
Республикэм иеджапIэхэм, культурэм иунэхэм, зыгъэпсэфыпIэ паркхэм, тхылъеджапIэхэм мэфэкI зэхахьэхэр ащыкIощтых. Районхэм нэбгырабэ къарыкIынэу тэгугъэ. Мыекъуапэ ичIыпIэ зэфэшъхьафхэм концертхэр ащызэхащэщтых. Мэлылъфэгъум и 25-м пчыхьэм къэлэ паркым къыщырагъэжьэнышъ, зэхэтхэу урамэу Краснооктябрьскэм къырыкIощтых, мэфэкI концертыр филармонием щызэхащэ ашIоигъу. Къэралыгъо академическэ ансамблэу «Налмэсым» театрализованнэ концертыр къытыщт.
МэфэкIым шыухэр хэтыщтых, адыгэ шъуашэр нэбгырабэмэ къызыщалъэщт, адыгэ быракъыр зэхахьэхэм ащагъэбыбэтэщт. Адыгэ быракъым ехьылIэгъэ тхыгъэхэр гъэзетхэм къащыхаутыщтых, телевидениемкIэ ыкIи радиомкIэ къэтынхэр зэхащэщтых.
МэфэкIыр гъэшIэгъон зэрэхъущтым тицыхьэ телъ. Гъэзетеджэхэм, лъэпкъ шIэжьым ыгъэгумэкIыхэрэм пэшIорыгъэшъ Iофыгъохэм яIахьышIу халъхьанэу тыкъяджэ.
Сурэтым итыр: адыгэ быракъым имэфэкI изэхэщэкIо куп иапэрэ зэхэсыгъо хэлэжьагъэхэр.
ЕМТIЫЛЪ Нурбый
Адыгэ Макъ