18 March 2015

Абхъаз Республикэм и Президентэу Рауль Хаджимбэ зипэщэ лIыкIо купыр Адыгеим къэкIуагъ


Адыгэ Республикэм и ЛIышъхьэу ТхьакIущынэ Аслъан къызэрэригъэблэгъагъэм тетэу Абхъаз Республикэм и Президентэу Рауль Хаджимбэ зипэщэ лIыкIо купыр Адыгеим тыгъуасэ къэкIуагъ. Адыгеимрэ Краснодар краимрэ яадминистративнэ гъунапкъэ хьакIэхэм щапэгъокIыгъэх АР-м и ЛIышъхьэу ТхьакIущынэ Аслъанрэ Премьер-министрэу КъумпIыл Муратэрэ.

ЗызэIокIэхэм ыуж, къуаджэу Хьалъэ­къуае зэкIэри еблэгъагъ, Абхъазым и ЛIыхъужъэу Хъуадэ Адам исаугъэтэу ащ дэтым къэгъагъэхэр кIэ­ралъ­хьагъэх. Ежь ишIоигъоныгъэкIэ Ады­геим икIыгъэгъэ нэбгыри 150-мэ ахэтэу ткъош абхъазхэр ащ къыгъэгъунагъэх, ыпси щигъэтIылъыгъ. Ар зыхъу­гъэр 1992-рэ илъэсым ишышъхьэIу мазэ и 26-р ары.

- Зэкъошныгъэу ыкIи ныбджэгъуны­гъэу зэдытиIэм тэ тырэгушхо, ахэр уахътэм ыушэтыгъэх. Лъы­гъэчъэ заом тызыхэтым шъо шъутигъу­сагъ. Адыге­им илъэпкъхэм «тхьашъуе­гъэ­псэу» къышъо­тэIо, анахь охътэ къиным шъукъызэрэдготыгъэм фэшI. Абхъазым мамырныгъэ илъыным пае шъушIэрэ Iофхэм тащыгъуаз, лъэш дэдэу тышъу­фэраз, - къыIуагъ Рауль Ха­джимбэ.

Хъуадэ Адамэ дэзэуагъэу, иныб­джэгъугъэу Мухамед Килба джащ фэдэу шIэжь зэхахьэм хэлэжьагъ. Ар мы уахътэм щынэгъончъэнымкIэ Абхъазым и Совет исекретарэу мэлажьэ. Рауль Хаджимбэрэ Мухамед Килбарэ Адамэ ишъхьэгъусэгъэ Хъуадэ Светланэ гущыIэгъу фэхъугъэх ыкIи ЛIыхъу­жъым гъэхъагъэу иIэхэр ащ къыфаIота­гъэх.

ТхьакIущынэ Аслъан рэзэныгъэ гу­щыIэхэр хьакIэхэм апигъохыгъэх. Ащ къызэриIуагъэмкIэ, Рауль Хаджимби абхъаз лъэпкъым и Хэгъэгу зао хэлэжьагъ, Адыгеим икIыгъэ кIалэхэу абхъазмэ агоуцогъагъэхэр игъусэхэу зэуагъэ, ахэр дэгъоу ешIэх.

- Рауль Хаджимбэ бэмышIэу Аб­хъаз Республикэм и Президентэу ха­дзыгъ нахь мышIэми, хэгъэгоу зыщыпсэурэм шъхьафитыныгъэ иIэным пае бэ ышIагъэр. Зэоуж илъэсхэм Абхъа­зыр зэтегъэуцожьыгъэным фэшI ышIагъэри макIэп. Рауль Адыгеим къызэреблэгъа­гъэм IофыгъошIубэ къызэрэкIэлъы­кIощтым сицыхьэ телъ, - къыхигъэщыгъ Адыгеим и ЛIышъхьэ.

Джащ фэдэу ТхьакIущынэ Аслъан къыIуагъ Урысыемрэ Абхъаз Республикэмрэ зэдэлэжьэнхэм тегъэпсыхьэ­гъэ Зэзэгъыныгъэу зэдашIыгъэм ишIогъэшхо къызэрэкIощтыр. Ащ УФ-м и Президентэу Владимир Путинымрэ Абхъаз Республикэм и Президентэу Рауль Хаджимбэрэ 2014-рэ илъэсым ишэ­кIогъу мазэ кIэтхагъэх.

Абхъаз Республикэм и Президент­рэ АР-м и ЛIышъхьэрэ политикэм, экономикэм, культурэм ыкIи нэмыкI лъэныкъуабэмкIэ зэрэзэдэлэжьэщтхэм афэгъэхьыгъэ зэдэгущыIэгъухэр непэ яIэщтых.

ЗэIукIэм къыдыхэлъытагъэу ныхэу зикIалэхэр Абхъазым щыкIогъэ заом щыфэхыгъэхэм аIукIэщтых, КъокIыпIэм щыпсэурэ лъэпкъхэм яискусствэхэмкIэ Къэралыгъо музееу Мыекъуапэ дэтым еблэгъэщтых ыкIи Къырымрэ Севастопольрэ Урысыем къызэрэхагъэхьажьыгъэхэм фэгъэхьыгъэ митингым хэ­лэжьэщтых.

АР-м и ЛIышъхьэ ипресс-къулыкъу

Сурэтхэр А Гусевым тырихыгъэх

Адыгэ Макъ




No comments:

Post a Comment

Адыгэ Хэку
Дунае
Кавказ Урысие
Диаспорэ
Тхыгъэхэр
Хэкугъэзэжьын
Адыгэ УпчIэ
Археологиер Экологиер
Спортыр
Туризм