АР-м и Къэралыгъо Совет - Хасэм , мэлылъфэгъум и 29-м, зичэзыу зэхэсыгъо иIагъ. Ащ хэлэжьагъэх АР-м и ЛIышъхьэу ТхьакIущынэ Аслъан, Премьер-министрэу КъумпIыл Мурат, УФ-м и Къэралыгъо Думэ идепутатэу Натхъо Разыет, АР-м и Апшъэрэ Хьыкум и Тхьаматэу Трэхъо Аслъан, АР-м ипрокурор шъхьаIэу Василий Пословскэр, Конституционнэ Хьыкумым и Тхьаматэу ЛIыхьэтыкъо Аскэр, нэмыкIхэр.
Парламентым изэхэсыгъо щытегущыIэнхэу Iофыгъо 18 щагъэнэфэгъагъ. Апэу ыкIи анахь игъэкIотыгъэу Краснодар псыIыгъыпIэм епхыгъэ Iофхэм атегущыIагъэх. «Правительственнэ сыхьатым» ар къыдыхэлъытэгъагъ. ПсыIыгъыпIэу 1975-рэ илъэсым агъэпсыгъэм ыпкъ къикIыкIэ адыгэ чылэгъо 26-рэ, ар нэбгырэ мин 12-м ехъу, зэрагъэкощыгъагъэм имызакъоу, непэ республикэм зэрар мымакIэу ащ къыфехьы. Анахьэу иягъэ зэригъэкIырэр Тэхъутэмыкъое, Теуцожь ыкIи Красногвардейскэ районхэр, Адыгэкъал ары. ЧIычIэгъымкIэ псыр къакIозэ мы къуаджэхэм къакIэлъадэ, лэжьыгъэхэм иягъэ арегъэкIы, дамбэхэр илъэсипшI пчъагъэ хъугъэу зэрамыгъэцэкIэжьыгъэхэм къыхэкIэу зэхэуагъэх, псыр къадэунышъ, псэупIэхэр ыхьынхэм ищынагъо щыI. ЦIыфхэр псэу зашъохэрэр шапхъэхэм задимыштэжьырэр илъэсыбэ хъугъэ. Мыхэм анэмыкI зэрарыби къехьы. А зэпстэумэ апкъ къикIыкIэ Краснодар псыIыгъыпIэм игъэфедэн зэрарэу е шIуагъэу къытырэм изэгъэшIэн фэгъэзэгъэнэу Къэралыгъо Советым - Хасэм комиссии щызэхащагъ, республикэ пащэхэри ащ иIофшIэн къыхэлажьэх, мызэу, мытIоу уплъэкIунхэр ашIыгъэх, зэхэсыгъохэм ащытегущыIэх, ау нахьышIум ылъэныкъокIэ джыри зэхъокIыныгъэ фэхъугъэп.
ПсыIыгъыпIэм къызэлъиубытырэм ипроцент 90-рэ фэдизыр Адыгеим къыхахьэ нахь мышIэми, ар гъунэгъу краир ары зыгъэIорышIэрэр, щыкIагъэхэм ядэгъэзыжьын фэгъэзагъэр. Ащ фэшI Пшызэ бассейн псы гъэIорышIапIэм ипащэу Геннадий Саловымрэ федеральнэ къэралыгъо унитарнэ предприятиеу «Краснодар псыIыгъыпIэм» ипащэу Геннадий Никифоровымрэ зэхэсыгъом къырагъэблэгъагъэхэу къэгущыIагъэх. Краснодар къикIыгъэ пащэхэм псыIыгъыпIэм республикэм зэрар къыфимыхьыным епхыгъэу зэшIуахырэр мымакIэу ары къызэраIуагъэр. ПчъагъэхэмкIэ къаушыхьатыжьызэ, ашIагъэмрэ гухэлъэу яIэхэмрэ ащагъэгъозагъэх. Ахэм ягущыIэхэм уакъыпкъырыкIымэ, зыпари щынагъо щымыIэ фэдэу къыпщэхъу. Псыхъохэм ягъэкъэбзэн, нэпкъхэм ягъэпытэн ыуж итхэу, ащ пае сомэ миллиони 104-м ехъу къафатIупщыгъэу, 2020-рэ илъэсым нэс IофшIэнхэр зэшIуахыщтхэу ары къызэраIуагъэр, нэмыкIэу гухэлъэу яIэри макIэп. Ау АР-м и ЛIышъхьи, депутатхэми ахэм адырагъэштагъэп.
- ПсыIыгъыпIэм ипроцент 90-рэ фэдизыр Адыгеим къыфэгъэзагъ нахь мышIэми, илъэс 40-м ехъугъэу федэ зыпари къытфихьырэп, ары пакIошъ, зэрарэу цIыфхэм къафихьырэр мыухыжь, - къыIуагъ АР-м и ЛIышъхьэ. - ПсыIыгъыпIэр краим егъэфедэ, цIыфхэр псэу зэшъощтхэр ащ къареты, мэкъу-мэщым ыкIи нэмыкI хъызмэтхэм ащегъэфедэ, ау зэрарыр Адыгеим къыфэгъэзагъэ мэхъу. Ащ дедгъэштэн тлъэкIыщтэп. Мы Iофыгъом игугъу зытшIырэр бэшIагъэ, гъунэ горэ фэхъунэу щыт.
«Краснодар псыIыгъыпIэм» ипащэ упчIабэ фигъэзагъ, нэужым ащ ипшъэрылъхэр икъоу ымыгъэцакIэхэу, а IэнатIэм Iутыныр темыфэу зэрилъытэрэм къыкIигъэтхъыгъ. ПсыIыгъыпIэм ипащэ къыIорэмрэ Iофхэм язытет шъыпкъэрэ лъэшэу зэрэзэтекIыхэрэм къыкIагъэтхъыгъ. Краснодар псыIыгъыпIэр республикэм къыфагъэзэжьыным кIэщакIо зэрэфэхъущтхэри къаIуагъ. Нэужым мыщ епхыгъэ Iофтхьэбзэ гъэнэфагъэу АР-м иминистрэхэм я Кабинет, комиссиеу Къэралыгъо Советым - Хасэм щызэхащагъэм, прокуратурэм, нэмыкI къулыкъухэм зэшIуахын фаехэр къызщыгъэнэфэгъэ унашъор аштагъ. АР-м и ЛIышъхьэ депутатэу къэгущыIагъэхэм къыхагъэщыгъэ пстэури ащ хагъэхьажьынэу къариIуагъ.
Ащ ыуж депутатхэр тегущыIагъэх ыкIи шъэф шIыкIэм тетэу амакъэхэр фатыгъэх Елена Матвеевар АР-м и ЛъытэкIо-уплъэкIокIо палатэ итхьаматэу гъэнэфэгъэным. Депутатхэм янахьыбэм ащ дырагъэштагъ.
АтегущыIагъэх ыкIи аштагъэх Iахьзэхэлъ псэолъэшIыным хэлажьэхэу унэхэм яшIынкIэ зипшъэрылъхэр зымыгъэцэкIагъэхэм апкъ къикIыкIэ зэрар зышIыгъэхэм IэпыIэгъу ятыгъэным, къэлэгъэпсыным, 2015-рэ илъэсым телъытэгъэ республикэ бюджетым, чIыпIэ референдумым, чIыгу зэфыщытыкIэхэм ягъэIорышIэн, шъон пытэхэм яIугъэкIын афэгъэхьыгъэ хэбзэгъэуцугъэхэм зэхъокIыныгъэхэр афэшIыгъэнхэм яхьылIэгъэ законопроектхэр. Джащ фэдэу АР-м и Къэралыгъо Совет - Хасэм е нэмыкI субъектхэм яхэбзэихъухьэ къулыкъухэр кIэщакIо зыфэхъугъэ законопроектхэм, джэпсалъэхэм ахэплъагъэх ыкIи адырагъэштагъ.
Адыгэ Макъ
