Килограмм 66-м нэс къэзыщэчырэмэ якуп бэнэкIо IэпэIасэхэр щызэIукIагъэх. А. Ордэныр Узбекистан къикIыгъэ Муминовым «къабзэу» текIуагъ. Белоруссием щыщ бэнакIоу Ушивец залым чIэсхэр бэрэ Iэгу къыфытеуагъэх, ау тинарт шъао шIокIын ылъэкIыгъэп.
Андзаур зэIукIэгъур «къабзэу» къыхьыгъ. Италием илIыкIоу Бруно финалныкъом щыбэнагъ. А. Ордэныр ащи текIуагъ. Дышъэ медалыр зыхьыщтыр язэрэмыгъашIэу Францием испортсменэу Ле Блоучрэ Ордэнымрэ финалым щызэIукIагъэх. Андзаур текIоныгъэм нахь пэблэгъагъ шъхьае, аужырэ нэгъэупIэпIэгъухэм хэукъоныгъэу ышIыгъэр къегоуагъ. Француз спортсменыр псынкIэу зэрэIэбагъэм ишIуагъэкIэ, судьяхэм фэгъэкIотэнхэр къыфашIыгъэх.
Пщыжъхьаблэ щыщ нарт шъаоу Ордэн Андзаур ятIонэрэ чIыпIэр къыфагъэшъошагъ. Ащ иапэрэ тренерыр Нэджыкъо Руслъан, мы уахътэм ипащэр Беданэкъо Рэмэзан. Адыгэ къэралыгъо университетым физкультурэмкIэ ыкIи дзюдомкIэ и Институт, юридическэ факультетыр А. Ордэным къыухыгъэх.
Минскэ щыкIогъэ зэIукIэгъухэм Урысыем ибэнакIохэм медалих къащахьыгъ - тыжьынищырэ джэрзищрэ. ТIуапсэ щыщ Екатерина Вальковам, кг 63-рэ, Татарстан къикIыгъэ Нияз Билаловым, кг 100, ятIонэрэ чIыпIэхэр къахьыгъэх. Къэрэщэе-Щэрджэсым испортсменэу Огъузэ Альберт, кг 60, Анастасия Конкинар, кг 57-рэ, Самарэ щыщ, Алена Качоровскаяр, кг 78-рэ, Волгоград щапIугъ, ящэнэрэ хъугъэх.
ДзюдомкIэ шIушIэ Дунэе фондым ипрезидентэу А. Ротенбергер тиреспубликэ и ЛIышъхьэу ТхьакIущынэ Аслъанрэ Адыгеим дзюдомкIэ ифедерацие ипащэу Натхъо Инверрэ лъэшэу зэрафэразэр къызщиIорэ шIуp-фэс тхылъхэр къафигъэхьы-гъэх. Ордэн Андзаур дэгъоу зэрэбэнагъэр, щысэшIу къызэригъэлъэгъуагъэр, Адыгэ Республикэм ыцIэ спортышхом зэрэщиIэтырэр А. Ротенбергер хигъэунэфыкIыгъэх.
Опсэу, Андзаур! Адыгэм ыгу бгъэпытэу ущыI. Спортым щызепхьэрэ лIыгъэм тегъэгушхо, адыгэ быракъым учIэтэу уимедальхэм ахэбгъэхъонэу пфэтэIо.
Адыгэ Макъ