Украинэмрэ Европэ Зэкъуэтымрэ хуиту сату зэрызэдащIэну зэгурыIуэм къару игъуэтащ щIышылэм и 1-м, ар техуащ Киев хуэгъэзауэ Мэзкуум ерыскъы санкцэхэр къызэригъэщIам.
2014 гъэм и мэкъуауэгъуэм Украинэмрэ Европэ Зэкъуэтымрэ зэрызэгурыIуа сату хуитыр и Iыхьэщ нэхъ иныу щыт ассоциацэ зэгурыIуэныгъэм. ИкIи ар ущхьэгъу хуэхъуащ Украинэмрэ Урысеймрэ я зэхущытыкIэхэр хуабжьу екIэкIуэным.
А зэгурыIуэныгъэм Украинэм лъэкIыныгъэ ирет Европэ Зэкъуэтым и сату уэтыку иным пщIэ имыту ихьэну. Хуагъэфащэ абы украинэ экономикэм и зэныкъуэкъу лъэкIыныгъэхэр иригъэфIэкIуэну.
Европэ комиссым дыгъэгъазэм и 31-м хэIущIыIу ищIа зыхуэгъэзэныгъэм зэритымкIэ а зэгурыIуэныгъэр щхьэпэнущ Украинэм и экономикэр къэгъэщIэрэщIэнымрэ абы зыужьыныгъэ Iэмал нэхъыбэ етынымрэ.
Иджырэ къыздэсым урысей сату уэтыкумкIэ унэтIа зэпытурэ щыта украинэ экономикэм европэ бэзэр сату уэтыкумкIэ зигъазэу Европэ Зэкъуэтыим и мардэхэмрэ хабзэхэмрэ затригъэпсыхьын хуейщ.
Урысейр хуабжьу къигъэгубжьащ совет лъэхъэнэ лъандэрэ и къэухьхэм ита Украинэм къухьэпIэмкIэ зэрызигъазэм. ИкIи Урысейм а сату зэгурыIуэныгъэр куэд щIауэ еуб. А зэгурыIуэныгъэр минитIрэ пщыкIущ гъэм къызэтрагъэувыIауэ щытащ.
Абы ипкъ ит зыкъэIэтыныгъэр Киев къызэщIэста нэужь, традзащ Украинэм и урысейщIэплъ президентыр.
Абы иужь иту Урысейм Кърымыр иубыдри, абыкIэ щIидза хъуащ Украинэм и КъуэкIыпIэм щыIэ урысейщIэплъ сепаратистхэм я зыкъэIэтыныгъэр.
Иджы Урысейм езы и Iэмалхэр зэрехьэ Украинэмрэ Урысеймрэ яку дэлъа сату зэгурыIуэныгъэ хуитыр зэпигъэуным хуэунэтIауэ. Идэжкъым украинэ ерыскъыхэкIхэр Урысейм ирашэу.
Хуитыныгъэ Радио