Чъэпыогъу и 8-м гуманитар ушэтынхэм апылъ Адыгэ республикэ институтэу КIэрэщэ Тембот ыцIэкIэ щытым Адыгэ Республикэм и ЛIышъхьэу КъумпIыл Мурат КАФФЕД-м (Тыркуем икавказ ассоциациехэм я Федерацие) ипащэу Йылдыз Шекердж, КАФИАД-м (Тыркуем и Бизнес-ассоциацие) итхьаматэу Таймэз Юсыф, ДЕИК-м (Тыркуем IэкIыб къэрал экономикэ зэпхыныгъэхэмкIэ и Комитет) илIыкIоу Туран Акын зэIукIэгъу щадыриIагъ.
Мы зэIукIэгъум хэлэжьагъэх Адыгэ Республикэм и Премьер-министрэ игуадзэу Сапый Вячеслав, Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэу Владимир Свеженец, гуманитар ушэтынхэм апылъ Адыгэ республикэ институтым идиректорэу ЛIыIужъу Адам, республикэ министерствэхэмрэ ведомствэхэмрэ яIэшъхьэтетхэу экономикэм, зекIоным ыкIи цIыф лъэпкъ зэфэшъхьафхэм азыфагу илъ зэфыщытыкIэхэм афэгъэзагъэхэр.
Адыгеим и ЛIышъхьэ зэрэхигъэунэфыкIыгъэмкIэ, урысые-тыркуе зэдэлэжьэныгъэм тегъэпсыхьагъэу республикэр фэхьазыр Тыркуем щыпсэухэрэ адыгэхэм IофшIэным, культурэм, гъэсэныгъэм япхыгъэ гъусэныгъэ пытэ адыриIэным.
«Адыгеим иофициальнэ лIыкIохэр сигъусэхэу Тыркуем тызэкIом экономикэмкIэ ыкIи продукциеу IэкIыбым рищын ылъэкIыщтымкIэ республикэм амалэу иIэхэм такъыщыуцугъ. ЗэдэлэжьэныгъэмкIэ гугъапIэхэр анахьэу зэпхыгъэхэр производствэр, къыдэгъэкIыжьыныр ыкIи мэкъумэщ продукциер: адыгэ къуаер, пынджыр, коцыр, чъыгхатэхэм къатхэрэ пхъэшъхьэ-мышъхьэхэр, нэмыкIхэр Тыркуем IэкIэгъэхьэгъэнхэр. НепэкIэ пшъэрылъ шъхьаIэу тиIэр проектхэр щыIэныгъэм щыпхырытщынхэм пае тибизнес структурэхэр зэдэлэжьэнхэм иIоф зэшIохыгъэныр ары. Джащ фэдэу бгъуитIуми тифедэ хэлъ псэолъэшIынымкIэ, хьакIэщхэм ягъэпсынкIэ ыкIи зекIохэр нахьыбэу Адыгеим къихьанхэмкIэ тырку лъэныкъом ишIуагъэ къызэригъэкIон ылъэкIыщт амалхэм алъыхъугъэныр», — къыкIигъэтхъыгъ КъумпIыл Мурат.
Тыркуем иассоциациехэм япащэхэу мы Iофтхьабзэм къекIолIагъэхэм къызэраIуагъэмкIэ, Адыгеим илIыкIохэр Тыркуем зэрэщыIагъэхэм тилъэпкъэгъухэу ащ щыпсэухэрэмкIэ мэхьанэшхо иIагъ. ЗэрэхагъэунэфыкIыгъэмкIэ, пIэлъэ кIыхьэм тегъэпсыхьэгъэ, бгъуитIумкIи федэ къэзыхьыщтхэ зэфыщытыкIэхэр Урысыем дэшIыгъэнхэмкIэ Адыгеим дыряIэ зэпхыныгъэр джыри нахь гъэпытэгъэным мэхьэнэ гъэнэфагъэ зэриIэр Тыркуем иIэшъхьэтетхэм къагурыIуагъ. Тыгъосэрэ зэIукIэгъур шIуагъэ къэзытыщт зэдэлэжьэныгъэм хэхъоныгъэ ышIынымкIэ лъэбэкъушIу хъун ылъэкIыщт.
Адыгеим и ЛIышъхьэ къызэрэхигъэщыгъэмкIэ, Тыркуем зэрэщыIагъэхэм икIэухэу къыдалъытэгъэ проектхэр пхырыщыгъэнхэмкIэ лъэныкъуитIуми Iофтхьэбзэ гъэнэфагъэхэр щыIэныгъэм щызэдагъэцэкIэнхэм мэхьанэшхо иIэу щыт. Отраслэ зэфэшъхьафхэмкIэ Iофыгъохэу зэшIохыгъэнхэ фаехэр зэIукIэгъум хэлажьэхэрэм къагъэнэфагъэх. Ахэм зыкIэ ащыщых инвесторхэм алъэныкъокIэ зэрар мыхъущт хэбзэIахь политикэр тэрэзэу гъэфедэгъэныр, зекIоным, хьакIэщхэм яшIын, индустриальнэ паркхэр гъэпсыгъэнхэр, пхъэм хэшIыкIыгъэхэр, мэкъумэщ продукциер къызIэкIэгъэхьэгъэнхэр, джащ фэдэу гъэсэныгъэмрэ культурэмрэ япхыгъэ Iофыгъохэу къэуцухэрэр зэдызэшIуахынхэр.
Мы зэIукIэгъум илъэхъан Адыгэ Республикэм экономикэ хэхъоныгъэмкIэ и Министерствэ ипащэ Адыгеим инвестициехэм алъэныкъокIэ игъоу ылъэгъухэрэм ащигъэгъозагъэх. Республикэм и ЛIышъхьэ пшъэрылъ афишIыгъ тырку лъэныкъом бизнесымкIэ джыри нахь зэдэлэжьэныгъэ-гъусэныгъэ дыряIэным пае екIолIэкIэ гъэнэфагъэхэр къыхахынхэу.
Адыгабзэр къэухъумэгъэнымкIэ ыкIи зэгъэшIэгъэнымкIэ Iофыгъохэу къэуцухэрэм хэушъхьафыкIыгъэу атегущыIагъэх. ЗэрэхагъэунэфыкIыгъэмкIэ, Проект офисэу непэкIэ щыIэм мультфильмэхэм язэдзэкIын, адыгэ пшысэхэр тетхэгъэнхэм, бзэмкIэ курсхэр зэхэщэгъэнхэм, кIэлэцIыкIухэм апае бзэм фэлэжьэщт лагерым пшъэрылъ гъэнэфагъэхэр зэшIуихынхэм Iоф адешIэ. Илъэсэу къихьащтым бзэмкIэ проектхэм ахагъэлэжьэщтых Тыркуемрэ Иорданиемрэ къарыкIыщтхэ кIэлэцIыкIухэмрэ ныбжьыкIэхэмрэ. Джащ фэдэу адыгабзэмкIэ езыгъаджэхэрэм апае консультациехэр зэхащэщтых.
Адыгеим и ЛIышъхьэу КъумпIыл Мурат къызэрэхигъэщыгъэмкIэ, мы Iофыгъохэм адэлэжьэщт лъэныкъуитIу куп гъэнэфагъэ зэхэщэгъэн фае. Зэдэлэжьэныгъэм илъэныкъо пэпчъкIэ предложение гъэнэфагъэхэр ащ зэхигъэуцонхэр ыкIи къахилъхьанхэр ипшъэрылъыщт. Ащ дакIоу хагъэунэфыкIыгъ пIэлъэ кIыхьэм тегъэпсыхьагъэхэ гухэлъхэр щыIэныгъэм щыпхырыщыгъэнхэм пае бгъуитIуми язэдэлэжьэныгъэ джыри нахь зырагъэушъомбгъун зэрэфаер.
Адыгэ Республикэм и ЛIышъхьэ ипресс-къулыкъу