Гималаи икъушъхьэ анахь дахэм Адыгэ ныпыр щагъэIагъ


Адыгэ Республикэм щыщ къушъхьэзекIо Iазэу Геннадий Долговыр Гималаи икъушъхьэ дахэу Ама-Даблам (6856) идэкIоен мыгъэ хэлэжьагъ. ДэкIоегъум илъэхъан къушъхьэтхым нэсынхэкIэ метри I00 къэнагъэу купым щыщ нэбгыри 4 язым ипсауныгъэ къэдэигъ.

- ЗэкIэри дэгъоу кIощтыгъэ, зекIо гъогу хьылъэм ыкIэм тынэсыгъагъ, Ама-Даблам ышъхьагъ нэм къыкIэуцогъагъ, - къеIуатэ Геннадий Долговым. - ЫкIи гъусэу сэ сиIэр къэмэхыгъ. Изытет дэй дэдагъ. ЦIыфым  ищыIэныгъэ тэ тизекIуакIэ елъытыгъагъ. Къушъхьэтхым тызфищэщтыгъэми, тиныбджэгъу къетхьыхыжьыгъ.

ДэкIоеным хэлэжьэрэ Олег Афанасьевыр къыкIэлъыкIорэ мафэм изакъоу къушъхьэтхым дэкIоенэу ежьагъ ыкIи ар къыдэхъугъ. Адыгеим ибыракъэу зыдаштагъэр Ама-Даблам ышъхьагъ нэсыгъ. Адырэ къушъхьэдэкIуаехэм зипсауныгъэ зэщыкъуагъэр къыращэхыжьыгъ. Непал ипсэупIэ анахь благъэу Пангбоче (3900 м) къынагъэсыгъ. ДжырэкIэ ащ изытет дэгъу.

Адыгэ Сайт