Адыгэ Республикэм икъэлашъхьэу Мыекъуапэ къэзыуахьащт ку гъогоу ашIырэм изычIыпIэ дэжь непэ чIылъэужь (археологие) IофшIэнхэр щэкIох. Ащ фэдэ къэбар къыригъэхьагъ инстаграмым нэкIубгъоу щыриIэм Адыгэ Республикэм и ЛIышъхьэу КъумпIыл Мурат.
Республикэм икъэлэ шъхьаIэ къэзыуахьащт ку гъогум дэжь щыкIорэ чIылъэужь IофшIэнхэр зэрэлъыкIуатэхэрэр хэшIыкI зиIэхэм ауплъэкIугъ. ДжырэкIэ IошъхьитIумэ ушэтынхэр ащаухыгъэх, псэупIитIумэ IофшIэнхэр ащэкIох.
ЧIылъэужьакIохэм зэралъытэрэмкIэ, илъэс-лъытэным ыпэкIэ я 6 — 5-рэ лIэшIэгъухэм Меотхэм япсэупIэ мы чIыпIэр щытыгъ. ЧIычIэгъым къычIахыгъэх мыжъо-пIакIэм (керамикэм), джэрзым хэшIыкIыгъэ пкъыгъохэр ыкIи нэмыкIхэр. Ахэм къызэрагъэлъагъорэмкIэ, мы уахътэм псэущтыгъэхэм гъучI пкъыгъо зэфэшъхьафхэр къыдагъэкIыщтыгъэх.
"Мыр IофшIэн къинэу щыт. ЗэрэтлъэгъурэмкIэ, IэкIэ зыщетIэгъэхэ чIыпIэр зэтыраутыгъэу угощыгъэх, хэшIыкI зиIэхэм ахэр ауплъэкIузэ тилъэпкъ итхыдэ къытфаIуатэ. IофшIэнхэр заухырэ нэуж къагъотыгъэ пкъыгъохэр республикэм къинэжьыщтых, Адыгэ Республикэм и лъэпкъ музеим чIалъхьэщтых,"- къыIуагъ КъумпIыл Мурат.
AdygPlus
