Къэбэртэе-Балъкъар республикэм цIыфэу щаукIыхэрэм хэт афэгумэкIырэр?


Мы аужьырэ илъэсым Къэбэртэе-Бэлъкъарым цIыф шъэ пчъагъэ щаукIыгъ, ауIагъэхэр ащ нахьыб. УкIыгъэ пстэуми анахьыбэр адыгэх. Хэбзэухъумэк1о зэфэшъхьафхэм мафэ къэс террористхэр тыукIыгъ аIоу къатхы, а аукIыгъэхэр зэрэтеррористхэр къыгъэшъыпкъэжьэу лъэпсэ пытэ щыIэп, мыдэкIэ вахабитхэми хьыкумэтым епхыгъэ цIыф пстэухэми ахаох, тхьамафэ къэс цIыф заулэ аукIы. БгъуитIумкIи аукIыхэрэм анахьыбэр адыгэх, ада мы Iофым хэт фэгумэкIырэр? Хэт къэзыгъэуцущтыр? Хэт дэлажьэрэр? Хэт зипшъэрылъыр?

Апэдэдэу мы Iофыр къэгъэуцугъэнымк1э пшъэрылъ зытелъыр ыкIи пшъэдэкIыжь зыхьын фаер хабзэр ары, апэу федеральнэ хабзэр, етIанэ республикэр арых. Мыхэм япшъэрылъхэр зэрамыгъэцакIырэр гъэнэфагъэ, ада ащ Iофыр къыщэуцуа? Хьау къыщыуцурэп, ахэм япшъэрылъ амыгъэцакIэ зыхъукIэ пшъэрылъыр къызтефэрэр лъэпкъыр ары, цIыфэу а лъэпкъым щыщ пстэуми, тыда щыIэхэми мы зэрэукIыжьэр къагъэуцунэу пшъэрылъ ателъ. Адыгэ хэкум уисми, хэхэсым ущыIэми, уадыгэу зыплъытэжьэу ущытмэ, пшъэрылъ къыптефэ мы укIыныгъэ Iофыр къэбгъэуцунэу. Гъэнэфагъэ, мы Iофыр хэти изакъоу зэрэфэмылъэкIыщтыр, ау узэкъотэу удэлажьэмэ пфэмышIэн щыIэп.

Мы Iофым дэлэжьэнэу Адыгэхэм яIэр лъэпкъ организациехэр ары, ау непэ ахэм кIуачIэ яIэп, ахэр лъэшэу хъунхэм фэш1кIэ "сыАдыг" зыIорэ пстэуми къатефэ лъэпкъ организациехэм ахэхьанэу ыкIи кIуачIэу иIэр ахилъхьанэу. Лъэпкъ организациехэм тахахьэмэ ахэмэ кIуачIэ яIэ хъущт, етIанэ Iофыр къэдгъэуцун тлъэкIыщт. Дунаим анахь лIапэу тетыр цIыфыр ары, уилъэпкъ щыщ цIыфхэр аукIэу, о зи умышIэу ущысмэ а зыукIыхэрэм афэдэу охъу ыкIи "сэ сыадыг" пIонэу уфитэп.

Неущ умыIоу непэ уежьэнэу къыптелъ лъэпкъ организациехэм уякIолIэнышъ ыкIи уахэхьанэу, етIанэ Къэбэртэе-Бэлъкъарым къыщыхъухэрэм яхьылIагъэ Iофыр къащыпIэтыщт. Лъэпкъ организацие зыфатIохэрэр тыдэкIи щыIэх, Адыгэ хэкумкIи, ДиаспорэмкIи.

Гунэ Нарт