Украинэм зышъхьэ къизыхыжьхэрэм япчъагъэ нахьыбэ зэрэхъурэм къыхэкIэу шъолъырхэм ахэр атырагуащэхэзэ ашIы. Урысые Федерацием и Правительствэ унашъоу ышIыгъэм тетэу Украинэм игражданхэр мафэ къэс Ростов хэкум къыращыхэзэ нэмыкI шъолъырхэм пIэлъэ гъэнэфагъэкIэ ащагъэпсыгъэ пунктхэм аращэлIэщтых. Адыгеим мафэ къэс ащ фэдэ нэбгыри 150-рэ къихьащт. Джащтэу къетхы гъазетэу Адыгэ Макъ.
Мэкъуогъум и 30-м пчэдыжьым апэрэ купыр республикэм къежьагъ. Адыгэ Республикэм и Премьер-министрэу КъумпIыл Мурат зэIукIэу щыIагъэм ащ фэгъэхьыгъэу къыщиIуагъ.
Премьер-министрэм зэрэхигъэунэфыкIыгъэмкIэ, ошIэ-дэмышIагъэ зыхэлъ тхьамыкIагъоу къэхъухэрэм якIэуххэм ядэгъэзыжьынкIэ республикэ комиссием псынкIэ IофкIэ зэхищэгъэ зэхэсыгъор АР-м и Правительствэ и Унэ чэщым щыкIуагъ. Украинэм зышъхьэ къизыхыжьхэрэм апае пIэлъэ гъэнэфагъэкIэ джыри пункт хэр зэрэзэхащэщтхэм епхыгъэ Iофыгъохэм ащ щатегущыIагъэх. «ГъэпсэфыпIэхэу «Анастасиемрэ» «Шапсыгъэмрэ» зышъхьэ къезыхьыжьэжьыгъэхэм чIыпIэхэр джыри щарагъэгъотыщтых, непэ нэбгырэ 250-рэ фэдиз ахэм ачIэс. Джы купэу къэсыщтыр станицэу Ханскэм дэт политехническэ колледжым иобщежитие чIагъэтIысхьащт. Нэбгыри 100-мэ пIэлъэ гъэнэфагъэкIэ шъхьэегъэзыпIэ ар афэхъущт, нэбгырэ 50-р гъэпсэфыпIэу «Шапсыгъэм» щыIэщт. Ахэм апае зы мафэм тегъэпсыхьэгъэ гъомылапхъэхэр зэIуагъэкIагъэх», - къыIуагъ АР-м ивице-премьерэу Наталья Широковам.
ШIушIэ IэпыIэгъум изэхэщэнкIи IофшIэныр чанэу зэрагъэцакIэрэм, унагъохэу зышъхьэ къезыхьыжьэжьыгъэхэр езыгъэблагъэ зышIоигъохэм афэгъэхьыгъэ къэбархэр зэраугъоихэрэм афэгъэхьыгъэу ащ къыIуагъ. Муниципальнэ образованиехэм япсэупIэхэм Украинэм игражданхэр рагъэблэгъэнхэмкIэ амалэу яIэхэр агъэунэфых. Мы лъэхъаным муниципалитетхэм ахэр рагъэблэгъэнхэм фэхьазырых.
Ежь-ежьырэу республикэм къэкощыжьырэ цIыфхэм яучет ашIы. ЦIыфхэр социальнэу ухъумэгъэнхэмкIэ чIыпIэ къулыкъухэм къызэратырэмкIэ, мы лъэхъаным ехъулIэу нэбгырэ 221-мэ закъыфагъэзагъ IэпыIэгъум щыгугъхэу.
Адыгэ Республикэм и Премьер-министрэу КъумпIыл Мурат къэзэрэугъоигъэхэм анаIэ тыраригъэдзагъ Украинэм зышъхьэ къизыхыжьхэрэм пстэуми апэу медицинэ ыкIи психологическэ IэпыIэгъу аратыным, зэпахырэ узхэр къахэмытэджэнхэм ыкIи япсэукIэ щынэгъончъэу щытыным анаIэ атырагъэтынэу. Джащтэу къэбарэр къеухы гъазетэу Адыгэ Макъ.
КъэIогъэн фае, Сирием заоу щыкIорэр илъэсыщ хъугъэ. Ащ Адыгэ мин 120 щыпсэурэм щыщэу мин 15 фэдиз нэмыкI хэгъэгухэм арихьагъэх. Адыгэ хэкум 1500 фэдиз неIэп къихьан зылъэкIыгъэр. Мыщ щыщэу 500 ехъу неIэп Адыгэ республикэм къихьан зылъэкIыгъэр.
Непэ Адыгэ хэкум къагъэзэжьынэу фаехэр мин пчъагъэ мэхъу ау ахэр Урысием къихьэным пае визэхэр ащыкIагъ. Ахэм егъэблэгъэ тхылъхэр афэпшIын фае. Ащ фэдэ егъэблэгъэ тхылъхэр Хасэу "Пэрыт" афишIыщтыгъэ ау мы хасэм Урысие къэралэр едауи зэфишIыжьыгъ. Джащ фэдэу Урысие къэралыр мэлажьэ Адыгэхэр хэкум къамыгъэзэжьыным пае. МыдкIэ мары тэлъэгъу Украинэм щыщхэр хэкум къыратакъох ыкIи Москва республикэхэм яхьыкумэтхэм пшъэрылъхэр къафегъэуцу а Украинэм щыщхэр ежь республикэхэм ямылькукIэ аIыгъэнхэу.
Москвэ пшъэрылъэу къыфишIыгъэмкIэ Адыгэ республикэм мафэ къэс Украинэм щыщ нэбг I50 ыщтэн фае ыкIи ыгъэпсэунхэ фае. ЗэрэхъурэмкIэ тхьэмафэ заулэкIэ мин пчъагъэхэр къэкIощтых.
ТIуапсэ Пресс