АР-м статистикэмкIэ и ГъэIорышIапIэ къызэритыгъэмкIэ, нахьыбэу зыхэхъуагъэу агъэунэфыгъэхэр къолыр, шъоущыгъур, къэбаскъэр, кIэнкIэр, нэмыкIхэри.
Илъэситфэу пыкIыгъэм егъэпшагъэмэ, 2014-рэ илъэсым уасэхэм зэрахэхъуагъэм ипсынкIагъэ зэхапшIэу зыкъиIэтыгъ. ГурытымкIэ инфляциер процент 11,4-м кIэхьагъ. 2008-рэ илъэсым Урысыем щыIэгъэ кризисым ыуж илъэситфым къыкIоцI мыщ фэдизэу уасэхэм ахэхъуагъэу къыхэкIыгъэп, проценти 7-м ар къехъущтыгъэп. Гъомылапхъэхэм ауасэ зэхапшIэу зэрэхэхъуагъэм щэфакIохэм гу лъамытэн алъэкIыгъэп. Сыда пIомэ цIыфым мафэ къэс нахь ыгъэфедэхэрэр ары нахьыбэу зыхэхъуагъэхэр.
АР-м статистикэмкIэ и ГъэIорышIапIэ иIофышIэу В. Кузнецовам къызэриIуагъэмкIэ, анахьыбэу зыхэхъуагъэхэр гъомылапхъэхэр ары, ар процент 17,1-рэ мэхъу. Ахэм ащыщэу къолым процент 31,6-кIэ, шъоущыгъум процент 46,9-кIэ, къэбаскъэм процент 46,9-кIэ ауасэхэм зыкъаIэтыгъ.
Гъэмэфэ лъэхъаным кIэнкIипшIым сомэ 45-рэ ыосагъэмэ, джы пчъагъэр сомэ 70-рэ хъугъэ. НахьыбэрэмкIэ цIыфхэр гъунэгъу тучаным щыщафэщтыгъэхэмэ, джы нахь пыутэу зыщыщэхэрэм алъэхъух, нэмыкI щапIэхэм, бэдзэрхэм макIох.
Уасэхэм зыпкъитыныгъэ яIэным лъыплъэрэ комиссиехэу шъолъырхэм ащызэхащагъэхэм Iоф ашIэ. Ахэм ахэтхэр мафэ къэс сатыущапIэхэм япащэхэм, продукциер къыдэзыгъэкIыхэрэм аIокIэх, уасэхэр зыфэдизыр зэрагъашIэ, ар тапэкIи зэрэдамыгъэкIоещтым пылъых. Арэу щытми, Iофхэм язытет зэшIохыгъэ хъугъэу пфэIощтэп. Мы гумэкIыгъор Iофыгъуабэмэ япхыгъэу щыт. Ахэм ащыщ санкциехэр, чIыдагъэм ыуасэ къызэрефэхыгъэр, нэмыкIыбэхэри. Урысыем экономикэ хэхъоныгъэмкIэ и Министерствэ къызэритырэмкIэ, 2015-рэ илъэсым инфляциер проценти 7,5-м кIэхьан ылъэкIыщт.
Адыгэ Макъ
