Сыкъызэрырагъэблэгъам тету, щэкIуэгъуэм и 24 жэщым Тыркум и къалэ Истамбыл сыкъикIри 25 пщэдджыжьым сыхьэтыр 03:00 хуэдэхэм Минеральные Воды и деж кхъухьлъатэ тIысыпIэм сыкъэсащ.
Аэропортым тет къэрал гъунапкъэ блэкIыпIэм и деж си документхэм еплъу, си Iуэхур зэблахыну сыздежьэм, Урысейм сихьэнкIэ сыхуимыт щхьэусыгъуэкIэ сыбламыгъэкIыу къызагъэгъэзащ. СыщIрамыгъыхьэм и щхьэусыгъуэм куэдрэ сыщIэупщIарэ пэт "Тыркум щыIэ посольствэм деж къыщыбжаIэнущ» жаIэ фIэкI, нэгъуэщI зыри къызжаIакъым. Зы тхылъымпIэ кIапэм «19.08.2015» тратхэри, «мы пIалъэр къэсыхун Урысей Федерацэм укъихьэну ухуиткъым» къызжаIащ. Абы къыкIэлъыкIуэу, зы офицер къакIуэри си IэпхъуамбапIэхэр трихащ, аэропортым тет зы пэшым сыщIаубыдэри махуитIкIэ бжэр къетауэ сыщIагъэсащ.
ЩэкIуэгъуэм и 27-м сыхьэтыр 02:00-м деж кхъухьлъатэкIэ Тыркум сыкъагъэкIуэжащ. СыщIрамыгъыхьэм и щхьэусыгъуэ зэрыт документ сыщIэупщIа щхьэкIэ, жэуапыншэу сыкъагъанэри, сэрхуэдэ къабзэу къызагъэгъэзэжа нэгъуэщIхэм хуащI протоколыр къысхуамыщIу сыкъыIуагъэкIыжащ.
Тыркум къэзгъэзэжа иужькIэ Анкара къалэм щыIэ посольствэм сыкIуэу сыщIэупщIа щхьэкIэ, Урысей Федерацэм сихьэнкIэ сыхуиту, къыщIызагъэгъэзам и щхьэусыгъуэр езыхэм ямыщIэу къызжаIэжащ. Мы къызжаIахэр зырыт тхыгъэ сыщIэлъэIуарэ пэт къызамытыну жаIащ.
Аращи, сыныволъэIу си Iуэхур зытетыр зэхэвгъэкIынкIэ, икIи Урысей Федерацэм сыкъихьэнкIэ хуит сыхъужын щхьэкIэ фыкъыздэIэпыкъункIэ.
Боз (Гъут) Эрдогъэн (Erdogan Boz).
zapravakbr.ru