Граждан обществэм хэхъоныгъэ ышIыным ыкIи цIыфхэм яфитыныгъэхэр къэухъумэгъэнхэм афэгъэзэгъэ Советэу УФ-м и Президент дэжь щызэхэщагъэмрэ мыщ фэдэ Советэу АР-м и ЛIышъхьэ дэжь щыIэмрэ бэдзэогъум и 17-м зэхэсыгъо зэдыряIагъ.
Ащ хэлэжьагъэх АР-м и ЛIышъхьэу ТхьакIущынэ Аслъан, Премьер-министрэу КъумпIыл Мурат, федеральнэ инспектор шъхьаIэу ЛIыIужъу Адам, АР-м иминистрэхэм я Кабинет хэтхэр, хэбзэухъумэкIо къулыкъу зэфэшъхьафхэм, федеральнэ ыкIи республикэ къулыкъухэм, ведомствэхэм япащэхэр, нэмыкIхэр.
АР-м и ЛIышъхьэ ишIуфэс псалъэ граждан обществэм хэхъоныгъэ ышIыным ыкIи цIыфхэм яфитыныгъэхэр къэухъумэгъэнхэм афэгъэзэгъэ Советэу УФ-м и Президент дэжь щызэхэщагъэм изичэзыу зэхэсыгъо Адыгеим щыкIоным ежькIэщакIо зэрэфэхъугъэр пстэумэ апэу къыщыхигъэщыгъ.
- Iофыгъохэм шъхьэихыгъэу татегущыIэным, Советым Iоф дэтшIэным тэ сыдигъуи тыфэхьазыр, ары къезгъэблэгъэнхэм ушъхьагъу шъхьаIэ фэхъугъэри, - къыIуагъ ащ. - Зэфагъэрэ шъыпкъагъэрэ обществэм хэлъыным шъудэлажьэ, цIыфхэм ягумэкIыгъохэм хэкIыпIэ гъэнэфагъэхэр къафэшъогъотых. А зэпстэури цIыфхэм ящыIэкIэ-псэукIэ нахьышIу хъуным фытегъэпсыхьагъ. Ары пшъэрылъ шъхьаIэу тэ зыфэдгъэуцужьырэри. ТызэгурыIоу Iоф зэдатшIэмэ, шIуагъэ къызэритыщтым щэч хэлъэп.
Республикэм иэкономикэ хэхъоныгъэу ышIыхэрэми ЛIышъхьэр кIэкIэу къатегущыIагъ. Сомэ миллиарди 134-м нэсэу инвестициехэр ащ къыхэлъхьагъэ зэрэхъугъэр, УФ-м и Президент ижъоныгъокIэ унашъохэр апэ зыгъэцэкIагъэхэм республикэр зэращыщыр, зекIоным зызэриушъомбгъурэр анахьэу къыхигъэщыгъэхэм ащыщых. Хэхъоныгъэ пстэуми, джащ фэдэу лъэпкъ е дин зэпэуцужь зэримылъми общественнэ организациехэм яшIушIагъэ хэлъэу зэрилъытэрэм къыкIигъэтхъыгъ.
Граждан обществэм хэхъоныгъэ ышIыным ыкIи цIыфхэм яфитыныгъэхэр къэухъумэгъэнхэм афэгъэзэгъэ Советэу УФ-м и Президент дэжь щызэхэщагъэм итхьаматэу, УФ-м и Президент иупчIэжьэгъоу Михаил Федотовыр нэужым къэгущыIагъ. Адыгеим Iоф зэрэщашIэгъэ охътэ кIэкIым къыкIоцI цIыфэу исхэм ягумэкIыгъохэр шъхьэихыгъэу хэбзэ къулыкъухэмалъагъэIэсынхэ амал зэряIэр, пащэхэм ахэр Iэпэдэлэл зэрамышIыхэрэр, цIыфхэм адэгущыIэнхэм сыдигъуи зэрэфэхьазырхэр нэрылъэгъу къызэрэфэхъугъэм къыкIигъэтхъыгъ. Советым пшъэрылъэу иIэхэм къатегущыIэзэ, гумэкIыгъохэр къэралыгъом е субъектым ипащэ лъагъэIэсынхэм имызакъоу, ахэм язэшIохынкIэ екIолIэкIэ тэрэз къыхахыныр анахь шъхьаIэу зэрэщытыр къыхигъэщыгъ. Граждан обществэм хэхъоныгъэ ышIыным ыкIи цIыфхэм яфитыныгъэхэр къэухъумэгъэнхэм афэгъэзэгъэ Советэу АР-м и ЛIышъхьэ дэжь щызэхэщагъэм итхьаматэу, цIыфхэм яфитыныгъэхэмкIэ Уполномоченнэу Анатолий Осокиныр мыкоммерческэ организацие зэфэшъхьафэу республикэм итхэм, Советым иIофшIэн зэрэригъэжьагъэм къатегущыIагъ. Джащ фэдэу ащ гумэкIыгъоу цIыфхэм къырахьылIэхэрэм язэхэфын зэрэдэлажьэхэрэм, дэгъэзыжьыгъэ хъугъэхэм, джыри Iоф зыдэпшIэн фаехэм ащигъэгъозагъэх.
ЩыкIагъэу ылъэгъугъэхэм ядэгъэзыжьынкIэ еплъыкIэу иIэхэмкIэ къадэгощагъ УФ-м и Президент дэжь щызэхэщэгъэ Советым икомиссиеу мыкоммерческэ организациехэм зягъэушъомбгъугъэным фэгъэзагъэм итхьаматэу Елена Тополева-Солдуновари.
АР-м и ЛIышъхьэ пстэури къызэфихьысыжьызэ, щыкIагъэу къыхагъэщыгъэхэм ядэгъэзыжьын Iэпэдэлэл зэрамышIыщтым, охътэ благъэм ахэр зэрэщагъэзыещтхэм къыкIигъэтхъыгъ.
Зэхэсыгъом ыуж советхэм якомиссиехэм хэушъхьафыкIыгъэу Iоф ашIагъ. Ахэр Iофыгъоу зытегущыIагъэхэм ащыщых цIыфхэм социальнэ гумэкIыгъоу яIэхэм язэхэфын, экологием ылъэныкъокIэ фитыныгъэхэр къэухъумагъэ зэрэхъущтхэр, нэмыкIхэр. Лъэпкъ зэфыщытыкIэхэм, лъэпкъ культурэм алъэныкъокIэ фитыныгъэхэм якъэухъумэн афэгъэхьыгъагъ «Iэнэ хъураеу» зэхащэгъагъэр.
Адыгэ Макъ
Бэдзэогъум и 16-м, цIыфхэм яфитыныгъэхэр къэухъумэгъэнхэм афэгъэзэгъэ Советым Къуаджэу Дахэвскэ щыригъэкIокIыгъэ зэIукIэм щыщ сурэтхэр.
