Испанием ифутбол командэу «Барселонэм» щешIэщтыгъэ Натхъо Амир Урысыем иклуб цIэрыIоу ЦСКА-м аштагъ. ШышъхьэIум и 31-м А. Натхъор зэзэгъыныгъэм кIэтхагъ.
ЦСКА-м итренер шъхьаIэу Леонид Слуцкэм къызэрэхигъэщыгъэу, Натхъо Амир чIыпIэ зэфэшъхьафхэм агъэуцун алъэкIыщт. Гупчэм ыкIи ыпэкIэ ащешIэным, къэлапчъэм Iэгуаор дидзэным А. Натхъор нахь афэгъэзэгъэщт.
- Урысыем ихэшыпыкIыгъэ командэ хэтхэр, футболист цIэрыIохэу IэкIыб хэгъэгухэм къарыкIыгъэхэр ЦСКА-м щешIэх, - къытиIуагъ Натхъо Амир. - Тиунэкъощэу Натхъо Бибарс Израиль ихэшыпыкIыгъэ командэ хэт, ЦСКА-м ифутболист анахь дэгъухэм ахалъытэ. Сигуапэ ащ фэдэ ешIакIохэм саригъусэу командэм сызэрэхэтыщтыр.
Адыгэ Республикэм футболымкIэ икIэлэцIыкIу-ныбжьыкIэ спорт еджапIэ А. Натхъом щыригъажьи, ЦСКА-м аштагъ. Мыекъопэ «Зэкъошныгъэм» зэрэщешIагъэр А. Натхъом шIукIэ ыгу къэкIыжьы, иапэрэ тренерэу Александр Пахомкиным лъэшэу фэраз.
- СшынахьыкIэ сигъусэу ЦСКА-м сызэрэщешIэщтыр сэркIи гушIуагъо, - еIо Натхъо Бибарс. - «Рубин» Казань сыхэтэу тренер цIэрыIоу Курбан Бердыевым командэм къыригъэблагъи, турнирым тызэдыхэлэжьэгъагъ...
«Зэкъошныгъэм» щыригъэжьагъ
А уахътэм Амир ныбжьыкIаIоу щытыгъ. К. Бердыевым ар къыдилъытэзэ, А. Натхъор зыщешIэщтыр къыхихы шIоигъуагъ, ау Амир Мыекъуапэ къэкIожьыгъ. Футбол ешIэныр «Зэкъошныгъэм» щыригъажьэ шIоигъуагъ. «Адыгеим ифутбол ыпIугъэми, «Зэкъошныгъэм» щешIагъэп» зыфэпIощтыр къыраIокIынэу фэягъэп. Амир ятэу Адам кIэщакIо фэхъуи, футболист ныбжьыкIэм игупсэ республикэ къыгъэзэжьыгъ, «Зэкъошныгъэм» щешIагъ.
Футбол академиеу Тольятти дэтым А. Натхъор щеджагъ, Урысыем иныбжьы-кIэ хэшыпыкIыгъэ командэ щешIагъ, тренерхэм янэплъэгъу итыгъ. Сэнаущыгъэ зыхэлъ футболист ныбжьыкIэхэм яIэпэIэсэныгъэ зауплъэкIум, Амир Испанием икомандэ цIэрыIоу «Барселонэм» рагъэблэгъагъ.
«Барселонэм» къыхэкIыжьыгъа?
Тэ тызэрэщыгъуазэмкIэ, «Барселонэм» зэпхыныгъэ дыримыIэу А. Натхъор ЦСКА-м аштагъэп. Илъэс зытешIэкIэ нахь гъэунэфыгъэу Iофым тытегущыIэн тлъэкIыщт. «Барселонэм» икIэрыкIэу А. Натхъор ыштэжьын ылъэкIыщт, тренерхэр къылъыплъэщтых. Джырэ уахътэ зэнэкъокъу-зэгъэпшэн шIыкIэм тетэу «Барселонэм» футболист цIэрыIуабэ щешIэ.
Амир ныбжьыкIэхэр зыщешIэрэ командэм хэт, футболист анахьыкIэмэ ащыщ. Илъэс 19 зыныбжь адыгэ кIалэр командэ дэгъум щешIэ шIоигъу. «Барселонэм» шIэныгъэу щызэригъэгъотыгъэр зэIукIэгъухэм къащигъэлъэгъон имурад.
ЦСКА-м нэмыкIхэри къыфаех
Урысыем икоманди 2, Испанием икоманди 2 А. Натхъор рагъэблэгъэным пылъыгъэх. Амир ЦСКА-р къыхихыгъ. ЕшIэгъур стадионым щыкIо зыхъукIэ А. Натхъор зыгъэпсэфыпIэ тетIысхьапIэм бащэрэ тесынэу фэяхэп. Футбол ешIэзэ гъэхъагъэхэр ышIынхэу тегъэгугъэ.
Амир ЦСКА-м аштэным ыпэкIэ командэм итренерхэр Натхъо Бибарс еупчIыжьыгъэх. Охътэ кIэкIым къыкIоцI Амир кIырыплъыхи, ЦСКА-м зэрэхэхьагъэм фэшI Бибарс ишIушIагъи къыхэтэгъэщы.
Израиль къикIыгъэ Б. Натхъом къызэриIорэмкIэ, Амир игъусэу ЦСКА-м щешIэныр лъэшэу шIогъэшIэгъон.
Натхъо нахьыкIэм ЦСКА-м дэгъоу къыщыпэгъокIыгъэх. Тренер шъхьаIэу Леонид Слуцкэмрэ Амиррэ зэдэгущыIагъэх. Л. Слуцкэм футболист ныбжьыкIэм иешIакIэ шIогъэшIэгъон. Спортым хэшIыкI фызиIэхэм къызэраIорэмкIэ, ЦСКА-м иешIакIэ хигъэхъоным фэшI Амир ишIуагъэ къыгъэкIон ылъэкIыщт. КIалэм иIэпэIэсэныгъэ зиIэтыным пае нахьыбэрэ ешIэгъухэм ахэлэжьэн фае.
Бибарс къыкIэупчIэх
Б. Натхъом аужырэ уахътэм иешIакIэ къеIыхыгъэу къэбархэр зэхэтэхых. Пенальтир гъогогъуитIо зэрэдимыдзагъэр, ешIэгъухэм, нахьыпэрэм фэдэу, чанэу зэрахэмылажьэрэр тэлъэгъу. ЦСКА-р «Кубань» зыдешIэм ыуж Л. Слуцкэм зэрэхигъэунэфыкIыгъэу, Натхъо Бибарс футбол ешIэгъухэм ахэлажьэ зыхъукIэ, зэблахъоу бэрэ къыхэкIыгъэп, зигъэпсэфынэу уахътэ иIагъэп. ЦСКА-р «Спартак» зыдешIэм, Б. Натхъом игуетыныгъэ хэпшIыкIэу къеIыхыгъ.
Бибарс сымэджагъ, медицинэм иIофышIэхэр къеIэзагъэх. Пенальтим имызакъоу, ешIэгъу уахътэм къыкIоцI къэлапчъэм Iэгуаор бэрэ дидзэу шIэхэу зэриублэжьыщтым тицыхьэ телъ. Бибарс унэгъо дахэ иI, шъэожъые цIыкIуитIу епIу, ишъхьэгъусэ Кфар-Камэ щыщ. Адыгабзэр ясабыйхэм арагъашIэ.
Краснодар тызыщызэIокIэм
Пчыхьэр хэкIотагъэу Натхъохэу Бибарсрэ Амиррэ тадэгущыIагъ. Бибарс тиреспубликэ икIыгъэхэм къаIукIагъ. Бибарсрэ Амиррэ зэгъусэхэу сурэт заулэ атетхыгъ. Дэрбэ Байзэт, Лъащэкъо Милан, Александр Карпенкэр, нэмыкIхэри Натхъохэм гущыIэгъу афэхъугъэх, ау бэрэ благъэу зэкIэлъырытынхэ алъэкIыгъэп. Футболыр зикIасэхэу стадионым къэкIуагъэхэр нэбгыри 100 заулэ хъухэу къяуцокIыгъэх, нэпэеплъ сурэтхэр зэготхэу атырахыгъэх.
- ЦСКА-м тыфэгумэкIэу, Iэгу тыфытеоу стадионым непэ тыдэсыгъ, - къаIо футболым пыщагъэхэм. - Натхъохэм яшIуагъэкIэ, ЦСКА-м нахь тылъыплъэщт.
Телевидением, радиом якъэтынхэм лъэкъуацIэу Натхъор тэрэзэу къызэрамыIорэр бэмэ къыхагъэщыгъ. Зэунэкъощхэм ащ хэкIыпIэ къыфагъотыщтэу тэгугъэ. Тилъэпкъэу дунаим щитэкъухьагъэм итарихъ цIыфхэм тэрэзэу зэрагъэшIэным фэшI Натхъо футболистхэм егъэжьэпIэшIу ашIыгъ. Шъопсэу, Натхъо футболистхэр! Тхьэм насыпышIо шъуешIых.
Адыгэ Макъ
