Мы фестевалыр апэрэу районым щыкIуагъ, Iофтхьабзэм иегъэжьапIэми цIыфыбэ къыугъоигъагъ. Районым ит псэупIэхэм зэкIэми ятворческэ купхэм ащ зыкъыщагъэлъэгъуагъ. Теуцожь районым лъэпкъыбэмэ ялIыкIохэр зэрэщыпсэухэрэр ыкIы ахэм язэгурыIоныгъэр зэрэпытэр фестивалым джыри зэ къыгъэшъыпкъэжьыгъэу зэхэщакIохэм къыхагъэщы.
Илъсихым къыщегъэжьагъэу илъэспшIыкIублым нэс зыныбжь еджакIохэр къэшъонымкIэ, орэд къэIонымкIэ, лъэпкъ музыкэ Iэмэпсымэм якъегъэIонкIэ, усэ къеджэнымкIэ зэнэкъокъугъэх.
ОрэдыIо анахьыкIэу зыкъэзгъэлъэгъуагъэм илъэситф ыныбжьыгъ. ЗыкъызэрашIыгъэмкIэ, орэд къэIокIэ амалэу аIэкIэлъыгъэмкIэ, къашIыгъэр аныбжь зэрэдиштэрэр, ащыгъыгъэр – мы лъэныкъо пстэумкIэ сабыймэ уасэ афашIыгъ. Анахь дэгъухэм ыкIи анахь чанэу номинацие зэфэшъхьафхэм зыкъыщызгъэлъэгъуагъэхэм щытхъу тхылъхэр аратыгъэх.
Фестивалыр мыгъэ ылъэ теуцогъэ къодыеми, аужырэп зэхэщакIохэм аIо, илъэс къэс афэмышIыщтми, тапэкIэ лъагъэкIотэнэу агу хэлъ.
Адыгеим и Радио къытыгъэ къэбар
natpressru.info