Хъурцэм щырекIокIы Кавказым щыIэ бзэхэм язэгъэшIэн пылъ шIэныгъэлэжьхэм яя4 Дунэе Конференц. Къалэу Тбылыс къеблэгъагъэх Щэщэным, Дагъстан, Адыгеим щыщ бзэм изэгъэшIэн -иушэтын Iоф дэзышIэрэ шIэныгъэлэжьхэр. БзэшIэныгъэ зэхахьэр Тбылыс дэт БзэшIэныгъэ Институтым гъэ къэс щырекIокIы, ау мыгъэ Адыгеим щыщ нэбгыриплI къеблэгъагъэх. Ахэм ахэт ежь Хъурцэм щеджэгъэ адыгабзэмкIэ шIэныгъэлэжьэу Абрэдж Ачэрдан. Къэбэртэе-Бэлъкъарым щыщ шIэныгъэлэжьхэр къэкIон алъэкIыгъэп, ау яIофшIэнхэр къырагъэхьыгъэх.
Тбылыс мы мафэхэм щырекIокIрэ зэIукIэм щытегущыIэх джырэкIэ кавказыбзэхэм язэгъэшIэн, яушэтын фэгъэхьыгъэ Iофыгъохэм, упчIэхэм. Ахэр гущыIэм, гущыIэухыгъэм, гущыIэзэхэтыкIэм, мэхьанэм, гущыIэр къыздикIыгъэм, зэпхыныгъэу яIэхэм, бзэхабзэхэм нэмыкIхэми афэгъэхьыгъэх.
Адыгабзэм рыгущыIэрэ ыкIи адыгабзэм изэхэтыкIэхэм язэгъэшIэн пылъ хъурцэ бзэшIэныгъэлэжь ныбжьыкIэу Квахадзе Алеко къыхегъэщы ежьыр зэхахьэм хэмылэжьэшъугъэми хьакIэу къеблэгъагъэхэм яIофшIэнхэм зэрядэIурэр.
Квахадзе: Мы зэхахьэм анахь гъэшIэгъон упчIэхэр фэгъэхьыгъэх кавказыбзэхэм зэпхыныгъэу яIэхэм, протокавказыбзэхэм ятхыкIэ-зэхэтыкI.
Фитыныгъэ Радиом игущыIэгъугъэ хъурцэ шIэныгъэлэжь ныбжьыкIэу Квахадзе Алеко къызэрэхигъэщрэмкIэ ыпэкIэ адыгэ шIэныгъэлэжьхэр нахьыбэу Хъурцэм къызэреблагъэщтыгъэхэм лъыпидзэжьынымкIэ гугъапIэ иIэу ары. Джаущтэу ыпэкIэ уахътэм щыIэщт шIэныгъэушэтын зэхахьэхэми джы адыгэ нахьыбэ къэкIонэу елъытэ. Хъурцэм пэсэрэ уахътэхэм Адыгеим щыщ цIыфхэр щеджагъэх. Ахэм ахэтых джы дэдэм хэкумкIэ щызэлъашIэрэ бзэшIэныгъэлэжьхэри. Мыщ фэдэ Хъурцэм адыгэхэм ящеджэн хабзэр зэпыугъэ хъугъагъэ ыужрэ уахътэм.
Фитыныгъэ Радио, Щэрджэс Ларис
