Урысыем сабыеу къыщыхъугъэхэм япчъагъэ % 8 ехъоу хэхъуагъэу агъэунэфыгъ. Ар телъытагъ ит илъэсым икъежьапIэ къыщежьэу гъэтхэпэ мазэм нэс. Фэдэ къэтынхэр къыхьыгъэх мы мафэхэм Урысыем лэжьэнымкIэ ыкIи ухъумэныгъэмкIэ иминистрэ.
КIэлъыплъэныгъэм икъэтынхэмкIэ, къэхъуныгъэр щагъэунэфыгъ Урысыем ичIыпIэ 31. Адыгеири ахэм ахэт. Мыщ къэхъуныгъэм ихэхъон %10.
Къэралыгъом щыщэу дунаим ехыжьыгъэхэм япчъагъэ хэхъуагъэу кIэлъыплъэныгъэм къыгъэнэфагъ. Ау ащ икъэгъэлъэгъонхэм ащыхэкIыгъэу ары Урысыем ичIыпIэ 11. Ахэм ахэтых Кавказ хэкухэу Къэрэщэе-Щэрджэсыр, Дагъыстаныр, Ингушетиер нэмыкIхэри.
Адыгеим щыщ бэдауш лэжьэкIо зырызмэ къыхагъэщы къэхъуныгъэм хэхъуагъэу агъэунэфыгъэми, адыгэ лъэпкъыр хэхъонымкIэ ар имыкъоу. ЛIэрэр нахьыбэу къэхъурэм нахьи ахэмэ къыхагъэщы.
Фитыныгъэ Радиом игущыIэгъугъэ Адыгеим щыIэ Мыекъопэ «Адыгэ Хасэм» ипащэу Чундышко Заурбий игущыIэхэмкIэ адыгэмэ унагъо ашIэным, лъэпкъым ицIыфышъхьэкIэ хэхъоным, сабыибэ къагъэхъуным ушъхьагъу заулэ иI:
Чундышко: Адыгэхэм яунагъохэр макIэу зэрэбагъохэрэр гъэнэфагъэх. ЦифрэхэмкIэ уеплъмэ къэхъуныгъэм икъэтынхэр нахьыбэу хъугъэнкIи мэхъу, ау лъэпкъым узеплъкIэ хэкIрэр нахьыб. Кум ыукIрэр, кIалэу лIэхэрэрнахьыб, сымэджэщым чIафэхэрэр ныбжыкIэ закI. Сэ сызэреплърэмкIэ, лъэпкъым хахъорэп хэмыкIрэмкIэ. ДжырэкIэ щыIэ щыIэкIэ хьылъэм къыхэкIэу ныбжьыкIэхэр егупшысэх сабыйхэр къагъэхъущтхэмэ.
Фитыныгъэ Радиом игущыIэгъугъэ Адыгеим щыщ Иринэ зы сабый епIу. Ащ къызэрэхигъэщрэмкIэ, сабый джыри къагъэхъуным пэрыохъу фэхъурэр экономик щытыкIэ хьылъэу хэкум щыIэр ары:
Иринэ: ДунаимкIэ щыIакIэр зэблэхъугъэ хъугъэ. Шъхьадж ищыкIагъэр бэ. Арышъ, сабыйхэр афэIыгъыщтхэмэ егупшысэх. Нахьыбэм сабыитIу къагъэхъухэрэр, къыхэкIых щы фаехэри.
АдыгеимкIэ къэхъуныгъэм икъэгъэлъэгъон щылъагэу къыхагъэщми, джаущтэу лIэныгъэм икъэтынхэри инхэу кIэлъыплъакIо бэмэ къаты.
Фитыныгъэ Радио, Щэрджэс Ларис