Адыгэ Республикэ, Рыфабгъо, щышъхьэIум и 15
ЛIэшIэгъухэм къапхырыкIыгъ
Ижъырэ адыгэ къужъым и Мафэ «Рыфабгъо ипсыкъефэххэм» блэкIыгъэ шэмбэтым ащыкIуагъ. Iофтхьабзэм цIыф бэдэдэ хэлэжьагъ, республикэм щыпсэухэрэм ямызакъоу, хьакIэхэри бэу къырищэлIагъэх. ЗэфэшIыгъэ Iахьзэхэлъ обществэу «Руфа-Тур» зыфиIорэмрэ АР-м зекIонымкIэ ыкIи зыгъэпсэфыпIэхэмкIэ и Комитетрэ ащ икIэщакIох.
Хабзэ зэрэхъугъэу, илъэс къэс адыгэ къужъым, хьалыжъом, къэбым ямафэхэр мы чIыпIэм щызэхащэх. Ахэм ахэлажьэхэрэм япчъагъэ нахьыбэ мэхъу зэпыт. Мыгъэ къужъым и Мафэ джащ фэдэу цIыфыбэ къырищэлIагъ - нэбгыри 130-рэ фэдиз ижъырэ адыгэ чъыгхатэхэр къызщыкIырэ чIыпIэм дэкIоягъ. А гъогууанэм икъэкIун IэшIэх дэдэу щытэп - псыкъефэххэр зэкIэ зэранэкIынышъ, ижъырэ адыгэ къужъым иIэшIугъэ ауплъэкIуным ишIоигъоныгъэ фабэм текIуагъ. Илъэсищ хъугъэ мыщ фэдэ мафэхэр зыхагъэунэфыкIыхэрэр, арышъ, мы гъогууанэр зимыщыпэлъэгъухэри ахэтыгъэх. Апэрэу дэкIоягъэри макIэп. Къэралыгъо зэфэшъхьафхэм къарыкIыгъэхэу Адыгэ къэралыгъо университетым щеджэхэрэми гъогу къинымрэ пкIышъхьэ-мышъхьэ шъоупсымрэ ауплъэкIун алъэкIыгъ.
ШIэныгъэлэжь зэфэшъхьафхэм агъэшIагъо икъурэ ижъырэ адыгэ къужъ чъыгхатэхэм анэсынхэ, ахэр алъэгъун амал зэряIагъэм зэригъэгушхохэрэр Iофтхьабзэм хэлэжьагъэ пэпчъ къыхигъэщыгъ. Къинэу гъогур къакIуфэ алъэгъугъэри ащыгъупшэжьыгъэу заплъыхьэщтыгъ. ЗекIохэр сыхьат фэдизрэ гъогу тетыгъэх, узэрыкIонкIэ хьылъэ дэдэ бгы лъагэхэр къызэранэкIыгъэх. Ау алъэгъугъэмрэ зэхашIагъэмрэ пстэуми ауас - чъыгэу илъэс 250-рэ фэдиз зыныбжьым джыри къыпыкIэрэ къужъыр ашхын амал яIагъ, псыкъефэххэр, тичIыопс идэхагъэ зэрагъэлъэгъугъ, зэхашIэгъэ пстэуми янэпэеплъ сурэтхэр зытырахыгъэх.
Гъогу хьылъэр къэзыкIугъэхэм Рыфабгъо изыгъэпсэфыпIэ къыщяжэщтыгъэх. Ахэм джыри зы ушэтын къапыщылъыгъ - къужъ зыдэлъ хьалыжъохэр нахь псынкIэу зышхыщтхэмкIэ шIоигъоныгъэ зиIэхэр зэнэкъокъунхэ фэягъэ. Зэнэкъокъур зезыщагъэу телерадиокомпаниеу «Адыгеим» иIофышIэу Тэу Замирэ ащ фэдэу къахищыгъэр нэбгырий. ЗэкIэми хьалыжъо тфырытф афагощыгъ, та-къикъищыкIэ апэ ахэр къэзышхыгъэхэм хьаку хьалыжъошхоу къужъ зыдэлъыр шIухьафтын фашIыгъ, джащ фэдэу мэфэкIым къекIолIэгъэ ХьацIыкIу Бэллэ къужъыр ыгъэфедэзэ ыгъэжъэгъэ IэшIу-IушIухэу мы пкIышъхьэ-мышъхьэм итеплъэ зиIэхэри ащ фигъэшъошагъэх.
МэлылыпсымкIэ, къужъыпсымкIэ ыкIи къужъ зыдэлъ хьалыжъохэмкIэ мэфэкIым къекIолIагъэхэр ыпкIэ хэмылъэу ахьэкIагъэх.
КIэухым мэфэкIым хэлэжьэгъэ пстэуми удж хъурае къашIыгъ.
ХьакIэу тиреспубликэ къеблагъэхи мэфэкIым къырихьылIагъэхэм ар бэрэ агу зэрилъыщтым, тишъолъыр щыпсэухэрэр къыкIэлъыкIощт зэхэхьагъум джыри къызэреблэгъэщтхэм щэч зэрахэмылъыр тэри нафэ къытфэхъугъ.
МэщлIэкъо Саид - Адыгэ Макъ
Сурэт инхэр зытырихыгъэхэр ГъукIэлI Сусан (facebook.com)
