Фэдэ зекIуакIэм иушъхьагъоу бэдаушхэм къыхагъэщырэр - Дунэе Адыгэ Хасэм политикэу ыхьрэм зэрэдырамыгъаштэрэр ары. Бэдауш лэжьакIохэм зэралъытэрэмкIэ, джырэкIэ Дунэе Адыгэ Хасэм лъэпкъымкIэ пшъэрылъэу иIэр ыгъэцакIэрэп ыкIи адыгэ лъэпкъым иIофыгъохэм язэшIохын фэлажьэрэп.
Фитыныгъэ Радиом игущыIэгъугъэ бэдауш лэжьакIоу, Пшызэ шъолъырым щыIэ «Адыгэ Хасэу» Дунэе Адыгэ Хасэм къыхэкIыжьыгъэмащыщым ипащэу Сохът Аскэр къыхегъэщы ушъхьагъоу ялъэубэкъукIэ хъугъэр.
Сохът Аскэр: Мы аужрэ илъэс зы-тIум Дунэе Адыгэ Хасэм хэтхэм ямылъытыгъэу ежь ашъхьэ къихьэрэ политикыр ашIы. Адыгэ Хасэхэм хэтхэм яеплъыкIэ ыгъэгумэкIхэрэп, яупчIыжьынхэуи зэрапэсрэп. АIэ къихьажьыгъэу дунаим тет адыгэхэм ацIэкIэ мэгущыIэх. Ащ телъытагъэу тэ тихаси тыхэлэжьэжьрэп. Ежь яеплъыкIэ темыфэмэ, адыгэхэр зэхэхьанхэ, фитыныгъэ ямыIэу джары ащ Iофэу зэрахьэрэр. Ащ зэмызэгъыныгъэ къытхелъхьэ.
Бэдауш лэжьакIоу Сохът Аскэр игущыIэхэмкIэ, адыгэхэр зыщыпсэурэ къэралыгъохэм арылъ шъхьафитныгъэр нахьыбэ зэрэхъугъэми къхэкIэу адыгэхэм яIоф изегъэкIони нахьышIу хъугъэу ары. Адыгэ Iофыр нахь лъыкIуатэу, нахь цIыфыбэ къыхэлажьэ хъугъэу еIо. Дунэе Адыгэ Хасэм адыгэхэр зэпигъэблэгъэным пакIоу ахэр непэ зэпэчыжьэ ешIых, зэлъигъэIэсхэрэп, зэмызэгъыныгъэ къахелъхьэ еIо Сохът Аскэр.
Фитыныгъэ Радиом игущыIэгъугъэ бэдауш лэжьакIоу Адыгеим щыIэгъэ «Щэрджэс конгрессэу» адыгэ лъэпкъгъэкIодым икъягъэштэн дэлажьэщтыгъэм ипэщагъэм игуадзэу Дзэукъожь Заур къыхегъэщы адыгэ Дунэе Хасэм изэрар нахьыбэ къакIоу ары, шIагъэу къыхьрэм нахьри.
Дзэукъожь Заур: Дунэе Адыгэ Хасэр бэ шIагъэ дунаим тет адыгэхэм зэрафэмылыжьэрэр. Зыфэлажьэрэр Урысыем иунэшъошI. Джащ пае цыхьа фашIырэп. А купыр зэрэзэхэтакъорэри сшIогъэшIэгъонэп. Ащ фэдэу щытыщтмэ – щымыIэмэ нахьышIу. ЗэфэпшIыжьмэ нахьышIу.
«Адыгэ Хасэхэр» Дунэе Адыгэ Хасэм къызэрэхэкIыжьыгъэхэм иушъхьагъушъун ылъэкIыщтэу Адыгеим щыщ бэдаушэу Бгъанэ Али къыхегъэщы пэщэныгъэ чIыпIэм ифэбэнэгъэни. Фэдэ Бгъанэм игущыIэхэр къетхых «Натпресс.ру» интернет къэбар лъыгъэIэс къулыкъум.
Адыгеим икъэлэ шъхьаI щылажьэрэ «Мыекъопэ Адыгэ Хасэм ипащэу Чундышко Заурбый Фитыныгъэ Радиом къызэрэриIуагъэмкIэ, бэдауш купхэр ары нахь зэготхъыныгъэ зиIэр, адыгэ лъэпкъыр арэп.
Чундышко Заурбый: Адыгэ Хасэхэр ащ нахь жьэуи къыхэкIыжьынхэ фэягъэх. Мэхьанэу халъхьагъагъэу, иIэн фэягъэр иIэжьэп. Адыгэхэр зэкIэ зэриугъоелIэншъы, упчIэжьыгъо купэу хъунэу ары хьисапэу фагъэуцугъагъэр.
Адыгэ бэдауш лэжьакIомэ къызэрэхагъэщрэмкIэ, Дунэе Адыгэ Хасэм фэшъхьафэу нэмыкI куп зэхэщэгъэным иупчIэ нафэу джырэкIэ къэуцу. Бэхэм къызэраIорэмкIэ, ащ фэдэ купыр IэкIыбым щыIэн фае, нахь шъхьафитэу иIофхэр лъигъэкIотэным фэшI. Ащ фэдэ купым ипэщэшъущтхэр джырэкIэ щыIэхэу бэдаушмэ къыхагъэщы.
Дунэе Адыгэ Хасэр 1991 илъэсым жъоныгъокIэ мазэм зэхащэгъагъ. Ащ ипшъэрылъхэр – адыгэ бэдауш купхэм яIофшIэн зэфищэн, лъэныкъо зэфэшъхьфхэм афэгъэзагъэу адыгэ лъэпкъым иIофыгъохэр зэшIуихыным дэлэжьэныр, бзэм , культурым , адыгэ лъэпкъ кIэныгъэхэм яухъумэн, язегъэушъомбгъугъэн фэIорышIэныр. 2012 илъэсым чъэпыогъум Дунэе Адыгэ Хасэм пэщакIэ фэхъугъагъ Сохърэкъо Хаути, ащ ыпэкIэ итыгъэ пащэу Ажахэ Къаншъэуби ычIыпIэкIэ хадзшъыри.
Ежь Дунэе Хасэм ишапхъэхэмкIэ купыр зэрэзэфэпшIыжьышъущт амалмэ ащыщ, ащ изэIукIэ-зэхэсыгъо фэдэ унашъом купым хэтхэм зэкIэм ятIонищ амакъэ фатмэ.
Фитыныгъэ Радио, Щэрджэс Ларис